De Rua

Verse 1:
Hallo es ist famos, so singt iadz gloa und groß
Machds eichre Ladn zua, Aufdnochd is, iadz is Rua
De Leid gähn zfrinn noch Haus, es gähn de Liachda aus,
Aussa im Gwandgschäft drennd, wo no a Lammbn brennd
Da Mo vom Rationalisierungsmanagement schaud in de Rund und reibd sie d’Hend
Ab sofort hamma bis hoibe 12e auf, de steigad sicha den Verkauf
So hodas mied belegta Stimm da Belegschaft vazäid, ach ja und fia de spadn Stundn gibds weniga Gäid
Iadz habds ja fia gleiche Arbad mehra Zeit, aussadem kemman do äh kahm Leid

Verse 2:
Ja mied da Rua es Leidl, is scho vorbei a Zeidl
Dafia is da Breiskampf z’hart, aa wo mas ned erwart werd gspard
D’Leid wern kündigt und dann stäid mas zum hoibn Lohn wieda an
Dazua werns Dog und Nochd aa no übawachd
In da Discounterfiliale drinn, streit da Leiter mied na Leiharbeiterin
Er hod an schregglichn Verdacht, hod zum Beweis a Video gmachd
Des zoagd den Kloogang dieser Frau, im Film do siggd mas ganz genau
Weil sie statt dem vorgschrimma oana tatsächlich zwoa Kloopapierbladl vawendt, werd ihra Zeitarbadsverhältnis iadz beendt

Verse 3:
Aa bei da Lebnsmittlqualität, werd gspart wos no grod gähd
Weil dLeid zum billig Metzga gengan und sie ganz oafach dengan
Mir doch wurschd wos I fia Wurschd do fries, wenns no grod billig is
Wurschd is a Götterspeiß,
Weil nur Gott den Inhalt weiß
In da Schlachtfabrik übam Wurschdkessl dem fettn, riesld da Mausdreg vo da Deggn
Nimmd ma den Baaz gnaua unddad Lupn, siggd ma vom Lehrbua d’Fingakuppn
Da Moasda tritt entspannt herbei und schütt an Kiebe Schlachtabfälle nei
Dazua an chemischn Gschmacksverstärker, na wersd scho koana mergga

Verse 4:
Wer is schuid an der Miser, frogd am End woi irgendwer,
Do brauchds eich ned bläd gstäin, hauptsächlich seidses es säim
Wer grod am Breis noch kaffd, muas sie ned wundan wenns so laffd
Und nadialich s’moderne Management, aba fia de woase scho a Patent:
De soidadn moi säim dalehm, wos sie fia Arbadsbedingunga gehm
Fia 6€ 6 Dog arbadn d `Woch, vo in da Fria bis 8de Aufnochd
A Stopuhr wenns beim biesln stähn, an Stromschlog wenns ned schnäi gnua gähn
Und in da Pause do gibds nur, a Wurschd vom Vinzenz Murr
Dazua an de Feaidog, an dene garbad wird ois sonda Knülla, an Weggn Brot vom Müller